Эркн мини улан залатнр!
Эндр мана өвк-деедсин заяҗ өвлсн үзг-бичг — «Тод бичг» санх, санулх, тоолш уга үнинь цуг олнд медүлх өдр мөн. Алтн делкә деер долан миңһн келн бәәнә. Теднә олн зун җилин турш хурасн зөөриг цааснд бичх үзг-бичг ут тоодан 140 бәәнә. Теднә дотр керглҗ бәәһә бичгүдин тонь урдкас үлү баһ. Тернь номтнрин тоолсар 40 һар үзг-бичг болна. Цуг эн учр-шилтәг кирцәд бәәхлә, бидн, хальмгуд, алтнас үлү ик зөөриг седклдән сәәнәр тогтаҗ бәрәд йовҗах улс мөн. Ода өрк-бүлән асрҗ, унд-теҗәлин төлә берк көдлҗ йовх цагт манахна зәрмснь хуучан санх арһ уга болҗ бәәнә. Зуг, «хөөткән сансн цецн сән» гидг үлгүрәр йовхла, хальмг күн болһн эврә үзг-бичгәсн эклҗ кел-сойлан сурч, бурхна номан сергәҗ, хальмг нерән дуудулх йоста болҗана. Мана үзг-бичгәр бичәтә хуучн ном-судр баргдш уга уурхан саңла дүңцүлхлә, худл биш. Цуг мадна керглх юмиг бидн тендәс татад авч чадҗанавидн. Тер төләд, күндтә мини нутгихн, эврә келн-бичгән һолл уга сурад, түүнд шамдҗ орад чигн, цуг эврә күч-чидлән ниилүләд йовый!
Цуг таднд мана үзг-бичгин өдрин байр күргҗәнәв!
Цаасн нимгн болвчн, номин көлгн
Цааҗ хату болвчн, олна җурм.
Цуг деедсин ухаг
Цуглулсн үзг-бичмдн
Кезә чигн эс мартгдад,
Кизәр уга байльг болад,
Кетркә баһчудын седклд тогтад,
Кемән уга делгрх болтха!
Геннадий Корнеев