Радонежин Сергийин Намтр хальмг келнд орчулгдсн мөн

Эндр, март сарин 29-д, Элст балһсна Хазни индртә чонҗд (Казанский кафедральный собор города Элисты) хальмг келнд орчулсн Радонежин Сергийин Намтр гидг дегтрин таньлцулһ (презентация) болсн юмн.

Орс хальмг хойр келәр бичсн дегтрин кевлләс һарснь Радонежин Сергийин шальр (мощи) олсна 600 җилин өөнд нерәдсн мөн. Әрәсән бичәчнрин Холвана гешүн, Хальмг Таңһчин сойлын ачта көдләч Каңкан Эрднь Ростовин Димитрийин «Радонежин җигтә һәәхмҗ үүдәһәчин, мана Хутгт Эцк Сергийин Намтрнь болн өвәрц йовдлмуднь» гидг бичвриг хальмг келнд орчулв. Орсин Үнн Алдртна Чонҗин Элст Хальмг хойрин салвр (Элистинская и калмыцкая епархия Русской Православной Церкви) дегтриг барас һарһв.

Эн арһ-кемҗәнд (мероприятие) Элст Хальмг хойрин архиепископ Юстиниан, Хальмг Таңһчин сойл болн зуулчллын ямин сәәдин орлгч Летуева Лариса, Хальмг келн өргҗлтин төвин закрл (директор) Корнеев Геннадий, Хальмг бичәчнрин Холвана ахлач Куликова Татьяна орлцсн мөн.

Амр-Санана Антона нертә үндсни номин саңгин көдләчнр, Пушкин Александрин нертә номин саңгин көдләчнр, Хальмг Таңһчин районмудын сурһулин салврмудын көдләчнр, Элст балһсна школмудын хальмг келнә багшнр бас орлцв.