Хальмг Таңһчин Толһач «Хальмг келн өргҗлтин төвд» ирв
Мана келнә му бәәдлиг кен эс меднә? Тер бийнь, энүнә хүв-заянь хальмг күн болһна һарт бәәһә. Хөрн һурвн җил өмн, 1999 җилин ноябрь сарин 17-нд Негдсн Үндсни Бәәһүлһ (ЮНЕСКО) төрскн келнә өдр зарлҗ һарһв. Шин миңһн җиләс авн эннь февраль сарин 21 темдглгдҗ бәәнә.
Эн җилин февраль сарин 21-д Хальмг Таңһчин Толһач Бату Хасиков «Хальмг келн өргҗлтин төвд» гиичлҗ ирәд, мана кесн көдлмшин тускар таньлдад авв. Өңгрсн җилин декабрь сарин 27 шинәс неегдсн мана төв төрскн келнә өдр күртл ик көдлмш кеҗ авсан тодрха кевәр медүлв.
Эндр бидн белдҗәсн дегтрмүдин тускар, эврә видеобичлгүдин тускар, гегәрлтин көдлмшин тускар чигн цәәлһҗ келәд өгввидн. Онц соньмсулсн керг-үүл болхла, хальмг келән интернетд орулх керг-үүл болв. Түүнд мадн эврә кеҗәсн текстиг үгд хүврүлгчиг үзүлҗ, Яндекс-орчулачин тускар келввидн.
Бас мана чинр иктә көдлмшин негнь ― тод бичгән сергәх, хуучн ном-судрмудин зург авч, келән меддг хальмгудын видео кеҗ, үгинь бичәд авч, диҗиталҗулад, хөөт үйнрт үлдәх керг. Тернь бас Хальмг Таңһчин Толһачиг ик гидгәр соньмсулв.
Ахр селвлцәнд бидн хальмг келән делгрүлн өргҗүлхин тускар күүндәд, түрүләд кеҗ авх керг-үүлсин зураг тогтаҗ авувидн. Тер тоод хальмг келнә кичәл кеҗ, эврә келән сурхар бәәсн хальмгудыг сурһх, Хальмг Таңһчин күн болһна седкл көдлүлҗ, келндән соньмсулх даалһврта болувидн.
Дунд сурһульд келән сурчах күүкдт шин көтлвр, дегтр, сурх бичг чигн белдҗ кех, хальмг келнә багшнрт туслмҗ күргх болн нань чигн туста, кергтә керг-үүлсиг уралан йовулх кергтә. Хальмг келн ― мана келн болхла, улан залата күн болһн терүг сергәхд шамдад орх йоста!
