Приветствие директора центра по развитию калмыцкого языка Геннадия Корнеева
Эркм мини нәәҗнр, эврә келндән хару улс!
Мана «Хальмг кел делгрүллһнә төв» һурвн җил көдлҗ бәәсәр келндән дөң-туслмҗ күргхин төлә олн керг-үүл күцәсн мөн. Зуг түүнд байсч ханад зогсх керг уга, кех юмн мань кеснәс үлү бәәнә. Ода мана төв эврә сайтта болв! Эннь цуг эврә келндән хару әмтнә көлдмшт ик нөкцл-туслмҗ болхнь лавта.
Өдгәһәс авн бидн эн сайтд тана соньрхл татхар шамдҗ, күч-чидлән әрвлл уга хальмг келнә үгмүдин туск соньн материалмудыг, эврә кел, сойл, шаҗ, тод бичг чигн сурх дегтрмүдиг, хальмг келнә хуучн болн шин тольмудиг орулҗ тәвәд бәәхм.
Бас энд тадн цуг мана төвин зәңг-чимә, зарлҗ бәәһә марһасин туск медә болн теднә зокал-җурм, хальмг келнә нер-томъя тогтадг комиссин зәңгсиг, келнә сүүрмүдин шиидвриг чигн олад, умшад, медҗ чадҗанат.
Кемр таднд сурх юмн бәәхлә, эн сайт деер мандла холва бәрәд, альдас болв чигн шуд сурвр бичәд илгәх арһ чигн бәәнә. Цуг тана сурврмудт бидн эрк биш хәрү өгхм гиҗ би батлулҗанав.
Ик эртәс авн мана өвкнр: «Күн дөңгәр, шовун далвагар» гиҗ келдг бәәҗ. Нег негндән түшг-тулг болад йовхла, мана келн сергәд, нутгтан делгрәд, олнд күндтә болад ирх гиҗ ицҗәнәв.
Хальмг кел делгрүллһнә төвин ахлач Г. Корнеев.
