Хальмг кел өргҗлтин төвин һардач Геннадий Корнеевин Чиңһс хаана медлсн өдрт зөрүлсн йөрәлин үг
Ахнр-дүүнр минь, алтн делкән моңһлчуд!
Ода, эндр, бүк моңһл туурһтн Эзн Богд Чиңһс хаана мендлсн 859 җилин өөниг темдглҗ бәәнә. Суут Богдын ухан-санаг бүтәҗ, делкә деерк хамгин ик хаант улсиг тогтасн көк моңһлчуд, бидн, әмд йовҗ бәәтл Чиңһс хаана нериг, түүнә аҗл-үүлсиг мартх арһ уга. Эн эрт-урд цагин алдрта түүк мань бүк биднә орчн үйин омг-сүрә болҗ, ирх цагт чигн өсч йовх баһчудын үлгр-бахмҗ болад, олн улст тарад одсн Эзн Богдын олн хөөчс биднд көгҗлтин учр-шилтән болҗ бүтх болтха!
Богд хаана сүлд теңгр
Бидн бүгдиг сәкҗ,
Буйн-кишг хәәрлҗ,
Буру-алдасиг әрлһҗ,
Көк моңһлчудын сүрәг
Кезә чигн өргҗүлн үүлдҗ,
Кентгтә дәәсиг дарад,
Кетркә җирһл оршулх болтха!