Нертә шүлгч, бичәч Җимбин Андрей Бурхн болв…

Җимбин Андрей Лагань нутга Ниицән хотнд 1924-гч җилд төрж һарсмн. Школан чиләчкәд, эклц школын багш болҗ көдлв. Удан болсн уга, дән эклв. 18 нас наслад уга бийнь, Андрей эврәннь дурарн алдр орн-нутган харсхар, хооран цухрлт угаһар, зуг «Уралан, Төрскнәннь төлә!» гисн һурвн үгәр туг кеҗ церглв.
Җирһлиннь хаалһдан үснә заводт чигн, колхозд чигн, Хальмг дегтр һарһачин директор болҗ көдлҗ йовсн күн. Болвчн, дурта көдлмшнь – «Хальмг үнн» газетин редакц. Тегәдчн, Җимбин Андрейиг бичәч болн журналист гиҗ келҗ чаднавидн. Өдгә цагин утх-зокъял Төрскнә харсгч Алдр дәәнә төр болн эгл күүнә җирһл-бәәдл гисн бүкл олн-әмтнә җирһл-бәәдллә залһлдатаһинь цәәлһҗ, олнд үзүлнә гихлә чик юмн. Хальмг болн орс келәр Җимбин Андрей хөр шаху дегтрмүд барлсмн: «Үүрмүд» (келврмүд, очеркс, 1961), «Алексейин туск келвр» (1963), «Иньгин хәләц» (келврмүд, 1964), «Күүнд му үзгдхлә» (түүк, 1968), «Халта ээлт» (поэм, 1969), «Күн болн цагт» (келврмүд, очеркс, 1971).
Өдгә цагт төвкнүн бәәхин төлә «Темән үүлн» гидг дегтрәрн (1973) төрскнч күүнә баатр йовдлыг сәәнәр сергәҗ, йоснднь үзүлҗ гиҗ келҗ болхмн.
Җимбин Андрей – шүлгч болн түүкч, болв түрүлҗ журналистин хаалһд орсн күн, тегәдчн энүнә «…барин халхар көдлләв…» гиснь – йир орта юмн, пенсьт һарсн бийнь, «Байр» седкүлд көдлдг билә. Көдлә бәәҗ, шин зокъял үүдәхән «мартхш» … Шүлгләни харуңһусас сүл цөөкнь: «Җирһлин айс» (шүлгүд, поэмс, 1975), «Цуг өөрхн ууҗм – цевр, өндр тууҗм» (шүлгүд, поэмс, 1975), «Цуг өөрхн ууҗм – цевр өнр тууҗм» (шүлгуд 1979), Намчрҗ көкрсн теңр дор» (1982), «Дусал болһнд – җирһл» (1984), «Эгл седкл». Түүкләни зокълмудас – «Темән үүлн» (роман, 1973 – 1977), «Шиндә» (түүк, келврмүд, 1974), «Таслгч эргц» (түүк, 1980). «Хальмг үнн» газетд, «Тегин герлд», «Баирт» — гидг седкүлмүдин халхст тасрлтан уга шин закъялмуднь барлгдна.

Җимбин Андрей (1924-2022)
Төрскн минь — гисн
Төрүц бууршго үгмүд —
Мини хөөтк үйнриг
Мөңкинд дахулх тугмуд.