ЭРИН ҺУРВН НААДН-2023

Үрс Сарин 23 шин өдрт, июнь сарин 11-д мана хальмг улсин кезәңк ик наадн, Эрин һурвн наадн Элстин урлдани талвңд (Элистинский ипподром) давулсмн. Эн ик наадыг “Бурхн Багшин алтн сүм” гидг Хальмгин төв хурл бүрдәв. Хальмг Таңһчин сойлын сәәдлң (министерство) концерт үзүлв.

Эрин һурвн наадна тускар келхлә, залусин арһ үзүлдг марһан болдг. Тер һурвн наадн болхла, саадг харвлһн, бөк бәрлдән, мөр урлдан болдг. Кезәнә цагт Υр Сарт улс болһна күмс эврә хурлын мүргүлд ирәд, гелңгүдәсн әдс авад, хурлын өөр Эрин һурвн наадн ата-марһа кедг билә. Өдгә цагт чигн эн заңшлыг хальмгуд мартл уга шинәс сергәсн мөн.

Өңгрсн долан хонгт болсн Эрин һурвн наадыг алтн сүмин гелңгүд «Өөрдин орна теңгрин саң» гидг хурл давулад эклв. Эн кезәңк өөрдин судриг кесг җил хооран “Билгин Дала” гидг ниигмин бүрдәцин (общественная организация) гешүд өдгә хальмг келнд орчулв.

Эн җилин нааднд олн күмс (люди), олн бүрдәцс орлцв. «Луч солнца», «Дари Белг» гидг хойр делгүр, ООО «Гаруда Групп» урлдана евән теткәч (спонсор) болв. Урлдана һол шаңгиг, машиг, Хальмг Таңһчин Толһач, Хасгин Бат, Хальмг Таңһчин Шаҗн Лам, Тензин Чойдак, урлдана шүүгчд шаң өгв. Харванд болн бөк бәрлдәнд Бартуна Олег евән теткәч (спонсор) болв.

Эн нааднд Шаран Бадм-Хаалһ арһ-кемҗәнә (мероприятие) көтлгч (ведущий) болад, дууһан дуулад, йөрәлән келәд, сәәхн кевәр давулв. Менән Бадм, Босхмҗин Мергн, Манҗин Санл марһана шүүгчнрт магтал келдг билә. Магтал келх йосн – кезәңк хальмгин йосн болна. Эн һурвн магталч эн сәәхн йосыг сергәнә. Цуг ирсн хәләһәчнрт мана артистнр концерт белглв. Босхмҗин Диана, Довдуна Нарн, Бүргдгин Айса, Поштара Мазн, Муукан Санл дууһан дуулв. Олн күмс босад биилв.

“Эрин һурвн наадн” гидг нәәриг мана төв хурл җил болһн давулхар бәәнә. Эн наадн – җинкн (настоящий) цуг хальмг улсин нәр болв. Мана хальмг улсин арвн-төрл болһна ачнр нег һазрт цуглрад, хамтдан бурхндан мүргәд, хамтдан байрлад, дуулад, бииләд, эн сән-сәәхн наадыг давулв.

Пресс-служба ЦРКЯ