ӨРИН ЦОЛМН

Өөрд улс олн  туульта, олн домгта. Шиңҗәңгин ард кевллин хораһин «Хан Теңгр» цуврл бичгин «Хан Харңһу» гидг дегтрин нег домгиг тод бичгәс өдгә цагин хальмг бичгт буулһад бичнәвидн.   

Өрин Цолмн

Кезәнә цагт 

Сүмбр уул деерәс хәләхд,

Хойр нарта хойр сарта болҗ

Үзгдҗ бәәгсн санҗ.

Тер цагт 

Теңгрин Долан Бурхн

Зүүнәс һарч,

Зөв эргәд хөөт бийәр

Хоор орх цагт,

Өрин Цолмн 

Өмнәс герлтҗ һарад

Өр цәәдг болгсн санҗ гинә.

Яһад гихлә

Эрт урд цагт 

Һазад далаһин тер бийд 

Орчлңд уга сәәхн үзсклңтә

Нег күүкн төргсн санҗ гинә.

Эн күүкн өдр удгсар өсн төлҗҗ,

Өңгтә зүстә болад,

Нутгин күмсин дур соньрхлыг татҗ гинә.

Гитл эн күүкн нутгин нег көвүнд

Седклнь тусад 

Түүнтә әәл-гер болҗ 

Хүрмлх гиҗ бәәҗ.

Яг (мөн) эн үйд,

Ид-сиднь күцгсн

Долан деермч бәәгсн бөгәд (союз книжн. «да, и»)

Эн орчлң-делкә деер

Тедниг дардг ид-сидтн

Йир һарад уга бәәгсн санҗ гинә.

Эн долан деермч

Орчлң-делкәг эргн төгәлҗ

Ид-күчән үзлцәд,

Нутг-нурһиг деермдҗ йовад,

Эн нутгин эн күүкиг олҗ үзәд,

Дурнь тусад,

Эн күүкиг авхар 

Күүкнь одх гигсн

Көвүг хорлҗ оркад,

Долалулн тер күүкиг 

Булалдгснд күүкн:

— Би деерм болх уга деерән

Тадн доланд бас одх уга! – гиҗ келәд,

Теңгрт һарад нисәд йовхлань

Ардаснь долан деермч

Цуврн дахҗ һаргсн санҗ гинә.

Тиигәд эдн кедү чинән

Хәәҗ көөгсн чигн

Тер күүкнә бараһинь чигн 

Олҗ үзгсн уга җиг (частица со значением «оказывается»).

Асхнднь дәкн зүн бийәснь цуврн һарч

Зөв эргәд барун хөөт бийәр

Хоор орх үйднь,

Одак күүкн өрин Цолмн болҗ

Өмнәснь герлтҗ,

Өр цәәҗ алтн шар нарн мандлн һарч

Орчлң-делкәг гиигүләд

Нег негән үзҗ бәәв чигн

Өөрдҗ чадх уга болһҗ оркгсн санҗ гинә.

Со.Норбу эмкдкв. Тод бичгәс өдгә цагин хальмг бичгт Т.Очр буулһв.

                                    ТӨРБАТЫН Очр