КЕН БӨКВИ? (тууль)

Кезәнә нег эмгн өвгн хойр бәәҗ. Нег хөөһән алад, делүһәрнь дееҗ бәрәд хонулҗ. Өрүнднь босхла, делүн мөснд наалдҗ одҗ.

• Делүн, чи юңгад мөснд наалдвч? – гиҗ өвгн сурна.
• Мөсн бөк, — гинә.
• Мөсн, чи бөквч?
• Бөкв — гинә.
• Бөк болхла, нарнд юңгад хәәлдвч?
• Нарн бөк, — гинә.
• Нарн, та бөквт? – гиҗ өвгн сурна.
• Бөкв, — гинә.
• Тегәд уулд юңгад халхлгднат? – гиҗ сурна.
• Уул бөк, — гинә.
• Уул, та бөквт? – гиҗ сурна.
• Бөкв – гинә.
• Күмнд юңгад малтулнат? – гиҗ сурна.
• Күмн бөк, – гинә.
• Күмн, та бөквт? – гиҗ сурна.
• Бөкв, — гинә.
• Бөк болхла, эрлг алмсас юунд әәнәт? – гиҗ сурна.
• Эрлг алмс бөк, — гинә.
• Эрлг алмс, бөквт? – гиҗ сурна.
• Бөкв, — гинә.
• Бөк болхла, яһад эрдм номд даргднат? – гиҗ сурна.
• Эрдм ном* бөк, — гиҗ.
• Эрдм ном, эрдм ном, үнәр бөквт? – гихлә, эрдм ном:
• Бөкв, — гиҗ.

Иигәд эрдм ном бөк болад эн делкәг эзлҗ гинә.

*ЭРДМ НОМ – БУРХНА НОМ гисн утхта үг.